最近收到好多問「讀 XX 科好唔好」嘅問題，其實咁主觀真係好難答。以下係決定一科「好唔好」嘅幾個因素，希望幫到大家。
課程教學質素
大學係學習嘅地方，課程幫唔幫到你獲取新知識同技能相當重要。包括讀啲乜嘢 course、教授教得好唔好、有冇培養科技知識、soft skill、國際視野。唔少同學希望大學課程能思辯、追求深入知識，思想上有昇華。
大學配套與氣氛
除咗自己個科之外，間大學整體氣氛都影響你四年體驗。三大更加國際化、資源多，中大同港大嘅書院制度、宿舍、活動幫你拓展人際關係。大學可能只有少過一半時間同你主科有關，成個 package 甚至比科目排名更重要。
出路與前 / 錢途
專業科目畢業有牌保證競爭力。其他科目其實你讀咩同你出嚟做咩冇必然關係，讀文科可以做商科。工作機會好多時唔係透過主修拎，而係睇你大學有冇參加活動、實習、建立人脈。
大學排名及科目排名
排名某程度反映課程質素，但唔能盡信，好多時排名跟研究院而唔係本科實力。想去外國從事研究，通常建議揀返三大，佢哋研究水平較高，國際上更多學術界人士認識。
國際交流機會
喺全球化世界下，同不同國籍、文化嘅人交流係重要技能。院校提供越多海外交流機會、校園越國際化，越可以擴闊眼界，成為全球公民。
所以一科好唔好其實有好多因素影響，要睇你重視啲乜嘢因素而決定揀邊一科。